."उद्या निंबाई चरणी 105 दांपत्यांचा संकल्प महायज्ञ.
"जिल्हा परिषदेच्या शाळा वाचविण्यासाठी व शेतकरी कन्या-पुत्र अभ्यासिकेचा नांदुरा पॅटर्न संपूर्ण राज्यात राबविणे करिता..'
नांदुरा प्रतिनिधी प्रशांत पाटील
नांदुरा :-जिल्हा परिषद शाळांचे खाजगीकरण करून त्या शाळा संपविण्याचा घाट शासनाने आखला असून गरिबांच्या शिक्षणाला त्यापासून मुकावे लागणार आहे.असे झाल्यास शेतकरी व शेतमजूरांच्या मुलांना महागडे शिक्षण घेणे अशक्यप्राय होणार असल्याने या शाळा वाचविण्यासाठी तसेच नांदुरा येथील शेतकरी पुत्र -कन्या अभ्यासिकेचा पॅटर्न राज्यातील सर्व कृषी उत्पन्न बाजार समितीत राबविण्याची सक्ती करून गाव तेथे अभ्यासिका सुरु करण्याची सद्बुद्धी शासनाला लागावी यासाठी नांदुरा तालुक्यातील सरपंच व सामाजिक क्षेत्रात अग्रेसर असणाऱ्या 105 जोडप्यांचा संकल्प महायज्ञ उद्या दि.24 डिसेंबर रोजी निंबोळा संस्थान येथे शेतकरी कन्या पुत्र MPSC,MPSC व शैक्षणिक विकास क्रांती संघटना,महाराष्ट्र राज्य च्या आयोजनातून संपन्न होत आहे.
जिल्हा परिषदेच्या शाळात आजही दर्जेदार शिक्षण दिले जात असले तरी रिक्त पदे ठेऊन शासन हक्काच्या शिक्षणापासून गरीब शेतकऱ्यांच्या मुलांना शिक्षणापासूनच वंचित ठेवण्याचा डाव रचत आहे. एकप्रकारे खाजगीकरणाला यामुळे वाव मिळणार असून तसे सुतोवाचही शासन करत असल्याने गरीब विद्यार्थी अशा या महागड्या शिक्षण प्रणालीतून बाहेर पडणार आहे.त्यामुळे जिल्हा परिषदेच्या शाळा बंद पडू नये म्हणून खरे तर शासनाला याची जाग यावी यासाठी या संकल्प महायज्ञाची संकल्पना पुढे करण्यात आली आहे.सोबतच नांदुरा येथे कृषी उत्पन्न बाजार समितीत संस्थापक अध्यक्ष राजेश गावंडे यांच्या संकल्पनेतून तयार झालेली शेतकरी कन्या पुत्र अभ्यासिका ही गरीब शेतकऱ्यांच्या मुलांसाठी फलदायी ठरली असून कितीतरी विद्यार्थी यातून नोकरीला लागले आहे. हाच अभ्यासिकेचा पॅटर्न राज्यातील सर्व कृषी उत्पन्न बाजार समितीत राबवून गाव तेथे अभ्यासिका सुरु करा या मागणीसाठी नांदुरा तालुक्यातील प्रसिद्ध असलेल्या निंबोळा येथील निंबाई आईच्या चरणी उद्या दि.24 डिसेंबर रोजी तालुक्यातील जवळपास सरपंच व सामाजिक कार्यात अग्रेसर असणाऱ्या 105 दांपत्याच्या संकल्प महायज्ञातून शासनाला जागी करण्याचे कार्य यामाध्यमातून केले जाणार आहे.