पनवेल आमदारांच्या नावाने वृद्धेचे दागिने लुबाडले

पनवेल प्रतिनिधी 

 पनवेलमधील आमदार प्रशांत ठाकूर यांच्या कार्यालयात धान्य व कपड्यांचे वाटप सुरू असल्याचे भासवून दोघा भामट्यांनी एका ७० वर्षीय वृद्ध महिलेजवळचे ५० हजार रुपये किमतीचे दागिने लुबाडून नेल्याची घटना शुक्रवारी पनवेलमध्ये घडली. पनवेल शहर पोलिसांनी या प्रकरणातील दोघा भामट्यांविरोधात फसवणुकीचा गुन्हा दाखल करून त्यांचा शोध सुरू केला आहे.

या घटनेत लुबाडल्या गेलेल्या वृद्ध महिलेचे नाव शाबिरा इस्माईल खान (७०) असे असून ती पनवेलमध्ये राहण्यास आहे. शाबिरा खान ही शुक्रवारी पनवेलमधील उरण नाका येथील आमदार प्रशांत ठाकुर यांच्या कार्यालयाजवळून पायी चालत बाजारात जात होती. यावेळी एका भामट्याने तिला अडवून आमदार साहेबांच्या कार्यालयात धान्य व कपड्यांचे वाटप चालू असल्याचे सांगितले. त्यानंतर त्या ठिकाणी आलेल्या दुसऱ्या भामट्याने तिला तीन वेफरचे पाकीट व २०० रुपये देऊन तुम्ही गरीब दिसले पाहिजे, नाहीतर तुम्हाला सामान देणार नाहीत, असे सांगून त्यांना गळ्यातील सोन्याची चेन, अंगठी व पैसे काढण्यास भाग पाडले.